Xəbərlər
Prezident İlham Əliyev: Ordu quruculuğu gələn il də prioritet sahə olaraq qalacaq
Ordu quruculuğu gələn il də prioritet sahə olaraq qalacaq. Bu sahəyə nə qədər lazımdırsa vəsait ayrılacaq.
Bu fikri Azərbaycan Respublikasının Prezidenti İlham Əliyev Nazirlər Kabinetinin 2015-ci ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında deyib.
Bu sahəyə daim böyük diqqət göstərildiyini vurğulayan dövlətimizin başçısı bildirib ki, bu da təbiidir, çünki Azərbaycan müharibə şəraitində yaşayır. Müharibə bitməyib və Ermənistan-Azərbaycan, Dağlıq Qarabağ münaqişəsi dondurulmuş münaqişə deyil. Bunu artıq hamı görür, o cümlədən bu məsələ ilə məşğul olan vasitəçilər.
İndi həm yeni texnikanın, silah-sursatın alınması, istehsalı prosesinin getdiyini, eyni zamanda, hərbi hissələr üçün ən yüksək səviyyədə şəhərciklərin, hərbi bazaların tikildiyini diqqətə çatdıran Prezident İlham Əliyev deyib: “Bu il Hərbi Dəniz Qüvvələrinin böyük bazası istifadəyə verilmişdir. Təmas xəttinə yaxın olan bölgələrdə yeni infrastruktur yaradılır və bizim döyüş qabiliyyətimiz artır. Təmas xəttindəki vəziyyət Azərbaycan ictimaiyyəti üçün sirr deyil. Biz tam üstünlüyü əldə etmişik, düşmənə sarsıdıcı zərbələr vururuq, düşmənin bütün təxribatlarına layiqli cavabımızı veririk”.