Xəbərlər
Azərbaycan xalqı bu dəfə də düzgün seçim edəcək
Qazax rayonunda seçicilərlə görüş keçirilib
2024-cü il fevralın 7-də ölkəmizdə keçiriləcək növbədənkənar prezident seçkiləri ilə əlaqədar Yeni Azərbaycan Partiyası tərəfindən namizədliyi irəli sürülmüş İlham Heydər oğlu Əliyevin seçkiqabağı təşviqat kampaniyası çərçivəsində Qazax rayonunun Kəmərli kəndində seçicilərlə görüş keçirilib.
Görüşdə YAP Qazax rayon təşkilatının sədri Anar Nəbiyev, təşviqat qrupunun üzvləri Firdovsi Umudov, Məmməd Yusifov, Bəsti Ələkbərova, İsgəndər Qurbanov və Kazım Kazımlı, şəhid atası Elxan Abdullayev çıxış ediblər.
Qeyd olunub ki, zamanın bütün sınaqlarından uğurla çıxan Yeni Azərbaycan Partiyası bu seçkilərə “Qalib xalqın Qalib Lideri” şüarı ilə inamla və qətiyyətlə gedir. Çünki Ümummilli Lider Heydər Əliyevin müəyyənləşdirdiyi siyasi kurs Prezident tərəfindən uğurla davam etdirilərək xalqımıza yeni uğurlar, nailiyyətlər, möhtəşəm qələbələr bəxş edir.
Çıxış edənlər Prezident, Yeni Azərbaycan Partiyasının Sədri cənab İlham Əliyevin 20 il ərzində misilsiz fəaliyyətindən ətraflı danışıb, müasir dövrdə Azərbaycan xalqının və dövlətinin böyük tarixi nailiyyətlər əldə etməsinin Prezident cənab İlham Əliyevin güclü liderlik keyfiyyətləri ilə sıx şəkildə bağlı olduğunu vurğulayıblar. 44 günlük Vətən müharibəsində şanlı qələbənin qazanılmasının, ərazi bütövlüyümüzün və suverenliyimizin bərpa olunmasının bunun əyani sübutu olduğunu qeyd ediblər.
Natiqlər qəti əminliklə bildiriblər ki, Azərbaycan xalqı həmişə olduğu kimi, bu dəfə də doğru, düzgün seçim edəcək.
Seçicilər vurğulayıblar ki, səsvermə hüququ olan bütün sakinlərimiz seçkilərdə fəal iştirak edəcəklər və Yeni Azərbaycan Partiyasının namizədi cənab İlham Əliyevə səs verəcəklər.
