Xəbərlər
Söz sahibi...
Nurəddin İbrahimov
YAP Gəncə şəhər təşkilatının sədr müavini
Azərbaycan dövləti tarixinin ən güclü dövrünü yaşayır. Bu bir reallıqdır. Prezident İlham Əliyevin yürütdüyü tam müstəqil siyasətin nəticəsində ölkəmiz qüdrətli, dünya miqyasında etibarlı tərəfdaş olan dövlətə çevrilib.
Prezident seçildiyi ilk gündən Ulu Öndər Heydər Əliyevin siyasətini davam etdirəcəyinə, hər bir soydaşımızın Prezidenti olacağına, düşmən işğalı altımda qalan torpaqlarımızı azad edəcəyinə söz verən cənab İlham Əliyev vədinə əməl etdi. Ən əsası XXI əsrin lideri İlham Əliyev Azərbaycanı həm siyasi-iqtisadi, hərbi cəhətdən qüdrətli, dünyada söz sahibi olan dövlətə çevirdi, həm də mənfur düşmənin illərlə sinsi-sinsi həyata keçirdikləri təcavüzkar, məkrli planları alt-üst etdi. Müzəffər Ali Baş Komandanımızın rəhbərliyi ilə rəşadətli Ordumuz, qəhrəman əsgərlərimiz düşmən tapdağı altında qalan müqəddəs torpaqlarımızın yarasına 44 gün ərzində məlhəm çəkdi, elimizə, obamıza möhtəşəm Qələbəni ərməğan etdi, yurdundan didərgin düşən yüz minlərlə soydaşlarımızın doğma ata-baba yurduna qayıdış ümidlərini reallığa çevirdi.
İlk dəfə 2003-cü ilin 15 oktyabr tarixində keçirilmiş seçkilərdə xalqın böyük əksəriyyəti öz səsini Ulu Öndər Heydər Əliyev siyasətinin davam etdirilməsinə və ölkədə sabitliyin qorunmasına verərək İlham Əliyevi Azərbaycan Respublikasının Prezidenti seçdi. Xalqın gözü tərəzidir deyimi tam öz əksini tapdı. Qədirbilən, yaxşını yamandan ayırmağı bacaran xalqımız düzgün seçim edərək sülhün, əmin-amanlığın, tərəqqinin, inkişafın, quruculuğun və sabitliyin tərəfində olduğunu nümayiş etdirdi. Elə o andan xalqimiz müasir dünya liderləri arasında yüksək intellekti, diplomatik məharəti, xüsusi natiqlik bacarığı ilə seçilən, adı tariximizə islahatçı lider kimi yazılan Prezident İlham Əliyevin bənzərsiz siyasi kursunu, qələbə strategiyasını birmənalı olaraq dəstəklədilər. Ötən illər də onu göstərdi ki, cənab İlham Əliyevin hakimiyyəti dövründə həyata keçirdiyi son dərəcədə müdrik, uzaqgörən, balanslaşdırılmış siyasət nəticəsində ölkəmiz misilsiz inkişaf yolu ilə addımladı. Məhz bunun üçün də 2018-ci il aprelin 11-də keçirilmiş növbədənkənar prezident seçkilərində görülən işlərə yüksək qiymət verən xalqımız yenidən Azərbaycan Respublikasının Prezidenti cənab İlham Əliyevə səs verdi, onu özlərinin lideri seçdilər. Azərbaycan xalqı 2018-ci il aprelin 11-də Azərbaycan xalqı Prezident İlham Əliyevə səs verməklə ölkədə aparılan demokratik islahatlara, Azərbaycanın qalib ölkə kimi tanınmasına səs vermiş oldu.
Bu illər ərzində İlham Əliyev xalqa verdiyi vədləri bütünlüklə yerinə yetirdi. “Ancaq iqtisadiyyatı güclü olan ölkələr müstəqil siyasət apara bilərlər” – deyən Prezident İlham Əliyev ölkəmizin bütün sahələrdə sürətli inkişafına nail oldu, Azərbaycanın siyasi, iqtisadi imkanlarını genişləndirdi, ölkəmizin beynəlxalq arenadakı mövqelərini möhkəmləndirdi. Bu gün regionda reallaşdırılan bütün beynəlxalq, irimiqyaslı layihələr Azərbaycanın iştirakı, onun milli maraqlarının nəzərə alınması ilə həyata keçirilir.
Cənab İlham Əliyevin Prezidentliyinin ilk ilindən etibarən ölkəmizdə dayanıqlı inkişaf üçün əsaslı addımlar atıldı. Müstəqilliyimizin və ideoloji dayaqlarımızın daha da möhkəmləndirilməsinin, vətəndaş həmrəyliyinin bərqərar olmasının təməlində Azərbaycan dövlətinin milli maraqlarının qorunması dayanırdı. Prezident İlham Əliyevin yürütdüyü siyasət Azərbaycanın müttəfiqlərinin və dostlarının sayını artırdı.
Son illərdə gözlərimiz qarşısında Azərbaycan misilsiz inkişaf mərhələsinə qədəm qoydu. Prezident İlham Əliyev ölkə iqtisadiyyatında qeyri-neft sektorunun xüsusi çəkisinin artırılması ilə bağlı müyyənləşdirdiyi siyasət öz uğurlu nəticələrini verdi. Nəqliyyat sisteminin yenidən qurulması ölkəmizin dünyaya çıxışını təmin etdi. Nəhəng infrastruktur layihələri həyata keçirildi. Prezident İlham Əliyevin rəhbərliyi ilə həyata keçirilən çoxtərəfli və balanslaşdırılmış xarici siyasət nəticəsində Azərbaycan regionda ən güclü və suveren, yüksək beynəlxalq nüfuza malik olan dövlətə çevrildi. Həyata keçirilən praqmatik xarici siyasət strategiyası ölkəmizə beynəlxalq münasibətlər sistemində müstəqil xarici siyasət həyata keçirən milli dövlət kimi etibarlı strateji tərəfdaş imici qazandı. Ölkədə əhalinin sosial rifahının yaxşılaşdırılması istiqamətində ardıcıl genişmiqyaslı dövlət proqramları həyata keçirilir. Yüzlərlə səhiyyə ocağının, müalicə-diaqnostika mərkəzlərinin inşası səhiyyə sisteminin inkişafına, minlərlə məktəb binasının tikilməsi, təhsil müəssisələrinin maddi-texniki bazasının gücləndirilməsi təhsilin zamanın tələblərinə uyğun qurulmasına mühüm töhfələr verir. Bunu təkcə Azərbaycan xalqı yox, beynəlxalq reytinq təşkilatları da açıqladıqları hesabatlarda qeyd edirlər. Müstəqillik tariximizin ən parlaq səhifəsi isə Müzəffər Ali Baş Komandan, Prezident İlham Əliyevin siyasətinin şah əsəri 44 günlük Vətən müharibəsində qazanılan Böyük Qələbə, torpaqlarımızım düşmən işğalından azad edilməsi oldu.
Bu gün isə qalib dövlət kimi Azərbaycanın qarşısında çox böyük imkanlar açılıb. Prezident İlham Əliyevin uzaqgörən siyasətinin məqsədi Azərbaycanın hərtərəfli inkişafı, xalqımızın firavan həyatıdır.