YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

Aqiyə Naxçıvanlı: Ölkəmizdə çoxpartiyalı parlamentin formalaşması siyasi islahatların ən önəmli nəticələrindən biridir

“Həqiqətən də 2020-ci il ölkəmizin tarixində ən əlamətdar, ən önəmli illərdən biri olaraq qalacaq. Təbii ki, bu ilin xalqımız üçün ən böyük əhəmiyyəti Azərbaycanın Vətən müharibəsində əldə etdiyi tarixi Qələbəsi və bu şanlı Zəfər nəticəsində özünün ərazi bütövlüyünü bərpa etməsilə bağlıdır. Lakin həmin il ölkəmizin ictimai-siyasi həyatında daha bir neçə önəmli hadisələr baş verimişdir ki, mahiyyət etibarı ilə bu hadisələr də məhz Azərbaycanın tarixi Qələbəsini təmin etmək məqsədilə Prezident İlham Əliyev tərəfindən artıq uzun illərdən bəri düşünülmüş şəkildə həyata keçirilən kompleks hazırlıq tədbirlərinin vacib tərkib hissəsi olmuşdur. O cümlədən, 2020-ci il fevralın 9-da keçirilmiş növbədənkənar parlament seçkiləri ölkəmizin həyatında önəmli hadisə idi. Möhtərəm dövlət başçımızın 2020-ci il mart ayının 10-da Azərbaycan Respublikasının altıncı çağırış Milli Məclisin ilk iclasında etdiyi tarixi çıxışında vurğuladığı kimi, bu seçkilərin fevral ayında keçirilməsinin əsas səbəbi islahatları dərinləşdirmək, vaxt itirmədən yeni tərkibdə Milli Məclisin işini təşkil etmək idi. Birmənalı olaraq demək lazımdır ki, həmin seçki prosesi böyük uğurla keçdi və bu seçkilərdə 1300-dən çox namizədin iştirak etməsi də uğuru təmin edən əsas amillərdən biri oldu. Həmin vaxt bütün namizədlər üçün bərabər şərait yaradılmış, heç bir ayrı-seçkiliyə yol verilməmişdi. Qeyd olunmalıdır ki, 2020-ci il parlament seçkilərini müşahidə etmək üçün ölkəmizə bir çox beynəlxalq təşkilatlar, müşahidəçilər dəvət edilmişdi və onların mütləq əksəriyyəti seçkilərin həm hazırlıq dövrünü, həm kampaniya dövrünü və həm də seçkilər gününü çox müsbət qiymətləndirmişdilər. Demək olar ki, müşahidəçilərin mütləq əksəriyyəti seçkiləri demokratiyanın inkişafında növbəti uğurlu addım kimi qiymətləndirmişlər və bəyan etmişlər ki, Azərbaycan xalqı azad şəkildə öz seçki hüququndan istifadə edib və seçkilərin nəticələri real mənzərəni əks etdirir. Eyni zamanda, Avropa İttifaqı seçkilərin keçirilməsi ilə əlaqədar çox obyektiv bəyanat vermişdi. Bəyanatda bildirilmişdi ki, Avropa İttifaqı yeni seçilmiş deputatlarla, Azərbaycan parlamenti ilə işləməyə hazırdır. Bu, əslində, seçkilərin tanınması deməkdir”.

Bu fikirləri Milli Məclisinin deputatı, professor Aqiyə Naxçıvanlı deyib.

Deputat bildirib ki, 2020-ci ilin 9 fevral seçkilərində ölkədə mövcud olan bütün siyasi qüvvələrin iştirak etməsi nəticəsində formalaşmış çoxpartiyalı parlament Azərbaycanda siyasi sistemin təkmilləşdirilməsi işində daha böyük rol oynamalıdır. A.Naxçıvanlının sözlərinə görə altıncı çağırış Milli Məclisin rəhbərliyində və komitələrin rəhbərliyində müxalifət partiyalarının nümayəndələrinin təmsil olunması Azərbaycanda siyasi sistemi möhkəmləndirən, siyasi münasibətləri sağlam zəmində gücləndirən əhəmiyyətli amil olub: “Son illər ölkəmizdə demokratiyanın inkişafı istiqamətində atılan ən əhəmiyyətli addımlardan biri məhz çoxpartiyalı parlamentin formalaşması olub. Etiraf olunmalıdır ki, ötən illərdə Milli Məclisin rəhbərliyində və komitələrin rəhbərliyində müxalifət partiyalarının nümayəndələrinin təmsil olunmaları kimi bir hal baş verməmişdir. Bu mütərəqqi addım da məhz Prezident İlham Əliyevin təşəbbüsü ilə atılmışdır və dövlət başçımızın həyata keçirdiyi uğurlu siyasi islahatların bir parçasıdır. Əlbəttə ki, Milli Məclis Azərbaycanda siyasi sistemi möhkəmləndirmək, siyasi münasibətləri sağlam zəmində gücləndirmək istiqamətində bundan sonra daha fəal iş aparmalıdır. Öz növbəsində Prezident Administrasiyasının nümayəndələri son vaxtlar demək olar ki, bütün siyasi qüvvələrin rəhbərləri ilə görüşlər keçirir. Çünki siyasi islahatlar partiyalararası geniş dialoq aparılmadan həyata keçirilə bilməz. Artıq Azərbaycanın yeni siyasi konfiqurasiyası formalaşır. Həmçinin qanunvericilik sahəsində də siyasi sistemin təkmilləşdirilməsi üçün Milli Məclis tərəfindən lazımi addımlar atılacaq və Azərbaycanda çoxpartiyalı sistem daha da möhkəm əsaslar üzərində inkişaf etdiriləcəkdir” – deyə A.Naxçıvanlı qeyd edib.

Daha sonra Milli Məclisin deputatı beynəlxalq əlaqələrin gücləndirilməsi və Azərbaycanın beynəlxalq nüfuzunun daha da artırılması istiqamətində görülən işlərin həm həcmini, həm də effektivliyini artırmağın vacibliyini vurğulayaraq bunları deyib: “Bu gün Azərbaycanın beynəlxalq aləmdə mövqeyi getdikcə möhkəmlənir, nüfuzu durmadan artır. Əlbəttə ki, bunu təmin edən ən başlıca amil Prezident İlham Əliyevin uğurla həyata keçirdiyi düşünülmüş, balanslı xarici siyasətdir. Məhz bu siyasətin sayəsində bu gün Avropanın enerji təhlükəsizliyinin təminatı məsələsində ölkəmizin rolu və önəmi getdikcə artır. Məhz bu uğurlu siyasət Azərbaycanı artıq təkcə regionun deyil, bütün Avrasiya məkanının aparıcı oyunçularından birinə çevirib. Xüsusilə son günlər Ukrayna hadisələri ilə bağlı aparıcı dünya və Avropa dövlətlərinin başçılarının Azərbaycan Prezidenti ilə mütəmadi telefon danışıqları və müzakirələr aparması da bu deyilənlərin bariz sübutudur. Bütün bu baş verənlərin fonunda əlbəttə ki, bu gün    Azərbaycanı müxtəlif beynəlxalq təşkilatlar çərçivəsində təmsil edən deputatlar da daha fəal olmalı, daha effektiv fəaliyyət göstərməlidirlər. Dövlət başçımızın da qeyd etdiyi kimi, o təşkilatlarda ki, Azərbaycana qarşı ikili standartlar, qərəzli yanaşma var, bizə qarşı ittihamlar irəli sürülür, biz orada daha mübariz olmalıyıq. Beynəlxalq təşkilatların, böyük dövlətlərin qarşısında yox, dövlətimizin, xalqımızın qarşısında yaxşı olmağa çalışmalıyıq. Bütün hallarda biz öz sözümüzü deməyi, qərəzli yanaşmanı ifşa etməyi bacarmalıyıq. Əlbəttə ki, bu baxımdan da bizim üçün ən böyük örnək yenə Ölkə Prezidenti cənab İlham Əliyevdir. Bu gün dünyaya, o cümlədən bizə  demokratiyadan dərs vermək istəyənlərin özlərinin törətmədikləri cinayət qalmayıb. Avropanın dırnaqarası demokratiya beşiyi sayılan ölkələrdə xalqın gözü qarşısında, dünyanın gözü qarşısında dinc nümayişçilərə amansız divan tutulur.  Lakin həmin dövlətlərə çox nadir hallarda irad bildirilir. Çünki onlardan asılı olanlar var, çəkinənlər var. Azərbaycan isə, sözün əsl mənasında müstəqil dövlətdir və Azərbaycanın tam müstəqil siyasət yürüdən Prezidenti var. Dövlətimizin başçısı hər zaman ən mötəbər kürsülərdən etdiyi çıxışlarında, verdiyi bəyanatlarda yalnız obyektiv həqiqətləri deyib, ikili standartları, saxta demokratiyanı ifşa edib. Bu gün Milli Məclisin beynəlxalq əlaqələri də məhz belə bir mübarizlik formatına əsaslanaraq inkişaf etməlidir. İstər Avropa Şurasında, istər ATƏT Parlament Assambleyasında, istərsə də bütün digər beynəlxalq təşkilatlarda təmsil olunan deputatlar heç bir kompromisə getməməli, həqiqətlərin təhrif olunmasına yol verməməlidirlər. Yalnız bu yolla biz ölkəmizin mövqelərini daha da gücləndirə biləcəyik”, – deyə A.Naxçıvanlı öz fikirlərini tamamlayıb.

DİGƏR Xəbərlər Arxiv