Xəbərlər
Böyük Britaniyanın ixracat naziri: Birləşmiş Krallıq Azərbaycanın suverenliyini və müstəqilliyini müdafiə edir
Birləşmiş Krallıq Azərbaycanın uzunmüddətli tərəfdaşıdır və ölkənizin suverenliyini, müstəqilliyini müdafiə edir. Biz bu uzun illər ərzində Azərbaycanın tərəfdaşı olmaqdan məmnunluq və şərəf hissi duyuruq.
Bu barədə Böyük Britaniyanın ixracat naziri Qraham Styuart Azərbaycan Prezidenti İlham Əliyevlə görüşündə bildirib.
Böyük Britaniyanı bir çox məsələlərin maraqlandırdığını qeyd edən Qraham Styuart deyib: “Birincisi, Birləşmiş Krallığın da sadiq olduğu, Sizin daha da yaşıl və dayanıqlı gələcəyə dair baxışınızdır. Hesab edirəm ki, Azərbaycanın nəinki təkcə uğurlu neft və qaz iqtisadiyyatına malik olan ölkə, eləcə də gələcəyi düşünən və uzunmüddətli perspektivdə strateji planlar quran bir ölkə olmasını təmin etmək Sizin baxışınıza uyğundur. Çünki gələcək daha da yaşıl olacaq, qlobal investisiyalar bu sahəyə yatırılacaq və münasibətlərimizi dərinləşdirmək üçün fürsət olacaq”.
Nazir vurğulayıb ki, BP Azərbaycanın strateji tərəfdaşıdır və orada böyük imkanlar var. “Düzgün siyasət və tədbirlər müəyyənləşdirməklə, Sizin ölkəniz üçün uzunmüddətli mirasınız ondan ibarətdir ki, Siz ölkənizi neft və qaz əsasında qurub inkişaf etdirmisiniz, lakin, eyni zamanda, gələcəyə də baxırsınız”, - deyə Qraham Styuart əlavə edib.