Xəbərlər
Deputatlığa namizəd Hikmət Babaoğlu 5 saylı Şəhər Klinik Xəstəxanasında müalicə olunan uşaqları ziyarət edib
Yeni Azərbaycan Partiyasının 19 saylı Nərimanov birinci seçki dairəsindən deputatlığa namizədi Hikmət Babaoğlu Nərimanov rayonu ərazisində yerləşən 5 saylı Şəhər Klinik Xəstəxanasının Yanıq şöbəsinin uşaq bölməsinə ağır yanıq diaqnozu ilə yerləşdirilən, hərbçi ailəsinin 11 yaşlı övladı Ümid Məftun oğlu Əhmədovu və xəstəxananın reanimasiya şöbəsində müalicə olunan 5 yaşlı Elmira Elçin qızı İsmayılovanı ziyarət edib.
Deputatlığa namizəd uşaqların səhhəti ilə maraqlanıb, onlara şəfa arzulayıb. 5 saylı Şəhər Klinik Xəstəxanasının Yanıq şöbəsinin müdiri Şöhrət Məmmədov uşaqların vəziyyətilə bağlı deputatlığa namizədə məlumat verib. Qeyd edib ki, uşaqların öz sağlamlıqlarına qovuşması üçün bütün lazımi tibbi tədbirlər görülür və onların durumu ciddi nəzarətdə saxlanılır.
Deputatlığa namizəd Hikmət Babaoğlu uşaqların valideynləri ilə də söhbət edib, onların övladlarına şəfa diləyib.
