Xəbərlər
Rusiyada fəaliyyət göstərən Azərbaycan Mədəniyyətinin İnkişafı və İntibahı Fondu və «Dostluq» təşkilatı cənab İlham Əliyevin seçkilərdə qələbəsinə inanır
Rusiya Federasiyasının Moskva şəhərində fəaliyyət göstərən Azərbaycan Mədəniyyətinin İnkişafı və İntibahı Fondu və Primorye vilayətində fəaliyyət göstərən «Dostluq» diaspor təşkilatı ölkəmizdəki prezident seçkiləri ilə əlaqədar bəyanatla çıxış edib.
Bəyanatlarda bu təşkilatların uzun illərdir Rusiyada fəaliyyət göstərdiyi qeyd olunur və bildirilir ki, bu fəaliyyətdə Dünya Azərbaycanlılarının birinci qurultayında Ümummilli liderimiz Heydər Əliyevin diaspor təşkilatlarına verdiyi tövsiyələr öndə tutulur.
Vurğulanır ki, bu tövsiyələrə uyğun olaraq təşkilat üzvləri azərbaycançılığın qorunması, ana dilimizin, mədəniyyətimizin, Azərbaycan həqiqətlərinin, xüsusilə Qarabağ həqiqətlərinin dünya ictimaiyyətinə çatdırılması işində daha fəal olmağa çalışırlar. Milli maraqlarımızın qorunması üçün bir çox diaspor təşkilatları ilə fəal əməkdaşlıq edilir.
«Azərbaycanın sürətli inkişafı, həyata keçirilən hüquqi, demokratik islahatların uğurlu nəticələri ölkəmizin parlaq gələcəyindən xəbər verir. Azərbaycanın dinamik inkişafı bizi çox sevindirir. Biz vətənimizə ümidlə baxırıq və inanırıq ki, bu tərəqqi davamlı olacaq. Bu gün dünyada yaşayan milyonlarla azərbaycanlı qüdrətli dövlətimizin gücünü, dəstəyini hiss edir. Bu baxımdan, aprelin 11-də keçiriləcək prezident seçkiləri bizim də diqqətimizdədir və inanırıq ki, Azərbaycan xalqı yenə də müdrik seçim edəcək, Ulu öndər Heydər Əliyevin siyasətini layiqincə davam etdirən cənab İlham Əliyevə səs verəcək»-deyə, bəyanatlarda qeyd olunur.