Xəbərlər
“Abşeron” yatağının operatorluğunu JOCAP həyata keçirəcək
Xəzər dənizinin Azərbaycan sektorundakı “Abşeron” qaz-kondensat yatağının operatorluğunu “Abşeron Neft” Birgə İstismar Şirkəti (JOCAP) həyata keçirəcək.
Energetika Nazirliyindən bildirilib ki, energetika naziri Pərviz Şahbazov Fransanın “Total” şirkətlər qrupunun Cənubi Avropa və Xəzər regionu üzrə vitse-prezidenti Bernard Klementin rəhbərlik etdiyi nümayəndə heyəti ilə görüşüb. Görüşdə Azərbaycanla əməkdaşlıq, eləcə də “Abşeron” qaz-kondensat yatağının işlənməsi ilə bağlı məsələlər ətrafında fikir mübadiləsi aparılıb.
Nazir “Abşeron” yatağının işlənməsi üzrə “Total” şirkəti ilə əməkdaşlıqdan məmnunluğunu bildirib. İlkin mərhələdə ölkədaxili tələbatın ödənilməsinə hesablanmış bu qaz layihəsi üzrə görülən işlər və ilk qazın hasil olunması istiqamətində planlaşdırılan tədbirlərlə maraqlanıb.
“Total” şirkətlər qrupunun vitse-prezidenti Bernard Klement SOCAR-la yüksək səviyyədə əməkdaşlığın nümunəsi kimi “Abşeron” qaz-kondensat yatağının operatorluğunu “Abşeron Neft” Birgə İstismar Şirkətinin həyata keçirəcəyini bildirib. Yataqda ilk quyunun VI nəsil Yarımdalma Qazma Qurğusu ilə qazılacağı və bu prosesin gələn ilin mart ayına kimi yekunlaşacağı, “Abşeron” yatağı üçün platformanın inşası, ixrac boru kəmərinin layihələndirilməsi və quraşdırılması işlərinə isə bu ilin ortasında start veriləcəyi qeyd edilib.
“Abşeron” yatağında hasilatın 2020-ci ilə planlaşdırıldığını deyən Bernard Klement ilkin mərhələdə illik təxminən 1,5 milyard kubmetr, 2022-2023-cü illərdə 5 milyard kubmetr qaz hasilatının nəzərdə tutulduğunu diqqətə çatdırıb.
Görüşdə bərpaolunan enerji mənbələri üzrə əməkdaşlıq perspektivləri ilə bağlı da müzakirələr aparılıb.