YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

Azərbaycan-Polşa Xarici İşlər nazirlikləri arasında siyasi məsləhətləşmələrin növbəti raundu keçirilib

Mayın 6-7-də Azərbaycan Respublikasının Xarici İşlər Nazirinin müavini Xələf Xələfovun başçılıq etdiyi nümayəndə heyəti Azərbaycan-Polşa Xarici İşlər nazirlikləri arasında siyasi məsləhətləşmələrin növbəti raundunun keçirilməsi məqsədilə Varşavaya səfər edib.

Azərbaycan nümayəndə heyəti Polşanın rəsmi şəxsləri ilə, o cümlədən Baş nazirin müavini, iqtisadiyyat naziri, Polşa-Azərbaycan Hökumətlərarası Müştərək İqtisadi Komissiyasının həmsədri Yanuş Piexoçinski, xarici işlər naziri Qjeqorj Sxetına, Prezident Administrasiyasının beynəlxalq məsələlər üzrə naziri Yaromir Sokolovski, xarici işlər nazirinin müavini Konrad Pavlik, Milli Təhlükəsizlik Bürosunun direktor müavini Zbiqnev Vlosoviç ilə görüşlər keçirib.

Görüşlərdə iki ölkə arasında siyasi, iqtisadi, humanitar sahələr üzrə münasibətlərimizin hazırkı vəziyyəti və daha da inkişaf etdirilməsi perspektivləri, regional təhlükəsizlik məsələləri, Beynəlxalq təşkilatlar çərçivəsində əməkdaşlıq imkanları müzakirə edilib. Həmçinin Hökumətlərarası Müştərək İqtisadi Komissiyanın Varşavada keçirilməsi nəzərdə tutulan növbəti VII iclasına hazırlıq məsələlərinə dair fikir mübadiləsi aparılıb.

Nazir müavini Xələf Xələfov Azərbaycan – Polşa münasibətlərinin inkişaf etdiyini bildirərək, ölkələrimiz arasında əlaqələrin daha da dərinləşdirilməsi üçün geniş potensialın olduğunu qeyd edib. O, Azərbaycanın regionda həyata keçirdiyi irimiqyaslı layihələrdə Polşa şirkətlərinin fəal iştirak edəcəklərinə ümidvar olduğunu bildirib. Bakıda keçiriləcək ilk Avropa Oyunlarında Polşanın yüksək səviyyədə təmsil olunacağından məmnunluğunu bildirən Xələf Xələfov bu ölkənin idmançılarına uğurlar arzulayıb.

Görüşlərdə Polşa tərəfi Azərbaycanın ərazi bütövlüyünü dəstəklədiyini və bu mövqeyin dəyişməz qaldığını bildirib. Eyni zamanda, qarşı tərəf Azərbaycanın Avropa İttifaqı institutları ilə əməkdaşlığının daha da inkişaf etdirilməsini dəstəklədiklərini vurğulayıb.

Keçirilmiş görüşlərdə Azərbaycanın Polşadakı səfiri Həsən Həsənov iştirak edib.