Xəbərlər
Sevinc Fətəliyeva: Azərbaycan tərəfi bütün beynəlxalq tədbirlərdə Ermənistanın ölkəmizə qarşı işğalçı siyasətini gündəmə gətirir
«Azərbaycan tərəfi bütün beynəlxalq tədbirlərdə Ermənistanın ölkəmizə qarşı işğalçı siyasətini gündəmə gətirir». Bu fikri yap.org.az saytına YAP-ın Beynəlxalq əlaqələr şöbəsinin müdiri, Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib.
S.Fətəliyeva bildirib ki, bu məsələ daim bizim gündəliyimizdədir. Onun sözlərinə görə, bütün beynəlxalq tədbirlərdə Ermənistanın işğalçılıq siyasəti və onun nəticələri haqqında geniş məlumatlar verilir.
«Ölkəmizin nümayəndə heyəti Avropa Şurası Parlament Assambleyasında işğalçı Ermənistana qarşı sanksiyaların tətbiq olunmasının vacibliyini dəfələrlə vurğulayıb. Çünki bu ölkəyə qarşı ciddi tədbirlər görülməsə, münaqişənin sülh yolu ilə həll olunması mürəkkəb olaraq qalacaq. Ona görə də, Azərbaycan diplomatiyası beynəlxalq müstəvidə işğalçı Ermənistanın yürütdüyü siyasətin mahiyyətini ifşa etmək və münaqişənin həlli ilə bağlı beynəlxalq hüquq prinsiplərinin tətbiq olunması istiqamətində bütün imkanlarını səfərbər edib»- deyə, S.Fətəliyeva vurğulayıb.