Xəbərlər
“Laçında gözəl qəsəbələr, kəndlər salınacaq” Müzəffər Ali Baş Komandanın 10 il bundan əvvəl söylədiyi bu fikirlər artıq gerçəkliyə çevrilir
İlqar İlyasov
YAP Laçın rayon təşkilatı sədrinin səlahiyyətlərini icra edən
Bu günlərdə biz bir il bundan öncə Müzəffər Ali Baş Komandan İlham Əliyev cənablarının rəhbərliyi ilə Azərbaycan ordusu tərəfindən, 30 ilə yaxın bir müddətdə erməni vandallarının işğalı altında olan torpaqlarımızın azad olunması sevincini yaşayırıq.
44 günlük Vətən müharibəsində Laçın rayonunun bir neçə yaşayış məntəqəsi Azərbaycanın müzəffər ordusu tərəfindən düşmən tapdağından azad edildi, rayon mərkəzi daxil olmaqla bəzi kəndləri isə 10 noyabr müqaviləsinə əsasən erməni silahlıları tərk etdilər. Bu 44 günlük Vətən müharibəsinin məntiqi nəticəsi idi. Azadlığına qovuşduğu bir il ərzində müzəffər Ali Baş Komandan İlham Əliyev cənabları iki dəfə - 14 fevral və 16 avqust tarixlərində Laçın rayonunda səfərdə olmuşdur. Hazırda Laçın istiqamətində dövlət sərhədləri möhkəmləndirilir. Eyni zamanda, Laçın rayonunda fərqli təyinatlı infrastruktur layihələri reallaşdırılır. 14 fevral tarixində Laçın rayonunda generasiya gücü 8 meqavat olan Güləbird Su Elektrik Stansiyasını işə salınıb. Bu stansiya təxminən 7000 nəfər əhalinin elektrik enerjisi ilə təminatında mühüm rol oynayacaq. Burada istehsal olunan elektrik enerjisi Qubadlı rayonunun Xanlıq kəndini, Laçın rayonunun cənub hissəsini və ərazidə yerləşən digər infrastruktur layihələrini elektrik enerjisi ilə təmin edəcək. Prezident İlham Əliyev vurğulayıb: “Bu, azad edilmiş torpaqlarda istismara verilən birinci elektrik stansiyasıdır və bunun çox böyük əhəmiyyəti, böyük rəmzi mənası var. Biz qayıdırıq bu torpaqlara. Biz Kəlbəcər və Laçın rayonlarında ermənilər tərəfindən uzun illər ərzində qanunsuz istismar edilmiş, onlar tərəfindən dağıdılmış bütün su elektrik stansiyalarını bərpa edəcəyik. Düşmən təkcə Laçın rayonu ərazisində 5 su elektrik stansiyasını dağıdıb. Onların hamısı bərpa ediləcək.”
Prezident İlham Əliyevin Sərəncamına əsasən tikilən Kəlbəcər-Laçın avtomobil yolunun uzunluğu 72,8 kilometrdir. Birinci və ikinci texniki dərəcəyə uyğun tikiləcək yolun hərəkət hissəsinin eni 9-16 metr olacaq. Yol üzərində 3 tunelin tikintisi aparılacaq. Tunellərin ümumi uzunluğu 9450 metr olacaq. Yeni yol infrastrukturunun yaradılması bölgənin iqtisadi inkişafına, eləcə də digər rayonlarla inteqrasiyasına geniş təkan verəcəkdir.
Laçında, ümumiyyətlə Şərqi Zəngəzurda heç zaman hava limanı olmayıb. Bir il bundan öncə kimsə desəydi ki, Laçında beynəlxalq səviyyəli hava limanı tikiləcək, həmin adama aydan gəlmiş kimi baxardılar. İşğaldan azad olunmuş üç bölgəmizdə, o cümlədən Laçında hava limanının inşası bölgənin beynəlxalq statusunu artıracaqdır. Artıq Laçın rayonunda beynəlxalq hava limanının tikintisinə start verilib. Hava limanlarının mülki aviasiya, yükdaşıma və hərbi əhəmiyyəti danılmazdır.
Qeyd edək ki, Laçın rayonunun Qorçu kəndinin ərazisində inşa ediləcək hava limanı bir neçə mühüm amili özündə ehtiva edir. İlk növbədə, şübhəsiz ki, burada aeroportun tikilməsi ümumilikdə bölgənin sosial-iqtisadi inkişafına təkan verəcək, mədəni və təbiət turizminin potensialının artırılmasına səbəb olacaq. Laçın hava limanının inşası həm də işğaldan azad edilmiş tarixi torpaqlarımızda aparılan abadlıq-quruculuq işlərinin miqyasının göstəricisidir. Olduqca mühüm strateji əhəmiyyətə malik olan Laçın aeroportu logistik mərkəzlərin yaradılmasına da töhfə verəcək. Laçın hava limanı Azərbaycanın dəniz səviyyəsindən ən hündürdə yerləşən aeroportu olacaq. Uçuş-enmə zolağının uzunluğu 3 kilometr olacaq hava limanında 6 təyyarə dayanacağının inşası nəzərdə tutulur. Bu hava limanı Kəlbəcər və Laçın rayonu ərazisinə hava nəqliyyatı ilə gediş-gəlişi asanlaşdıracaq. Prezident İlham Əliyev vurğulayıb: “Hesab edirəm ki, bu, bir çoxları üçün gözlənilməz oldu. Bəziləri bunu möcüzə hesab edirdilər. Çünki sovet dövründə heç vaxt bu bölgədə - Kəlbəcər-Laçın zonasında hava limanı olmayıb. Məhz bu səbəbə görə. Çünki çox bahalı bir layihə ola bilərdi və məqbul yer də tapmaq mümkün deyil. Ancaq biz bunu edirik. Müstəqil Azərbaycan dövləti buna da qadirdir. Buna texniki imkanlarımız da, maliyyə imkanlarımız da və güclü iradəmiz də var.”
Azərbaycan xalqı kimi hər bir laçınlı da azad olunmuş ərazilərdə qısa müddətdə həyata keçirilən infrastruktur layihələrini diqqətlə izləyir, inanırlar ki, yaxın zamanlarda öz ata-baba torpaqlarına qayıdacaqlar. Yenidən Laçın rayonu öz toy-büsatına, ər igidlərinə qovuşacaq. Prezident İlham Əliyevin 2011-ci il dekabrın 24-də, özünün doğum günündə Ağcabədi rayonuna gəlməsi və laçınlı məcburi köçkünlər üçün salınmış 552 evlik qəsəbənin açılışında iştirak etməsi, Laçın ictimaiyyəti üçün tarixi bir gün idi. Həmin görüşdə cənab Prezidentin qeyd etdiyi: "Mən, adətən, ad günlərimi qeyd etmirəm. Ancaq bu il qərara aldım ki, ad günümü öz ailəmlə və yaxınlarımla bir yerdə keçirim. Bu gün mən öz ailəmlə birlikdəyəm, mənim ailəm və yaxınlarım sizsiniz" - ifadəsi nəinki laçınlılar, bütün ölkə ictimaiyyəti tərəfindən rəğbətlə qarşılandı. Həmin görüşdə Prezident İlham Əliyev cənabları deyirdi: “Bizim torpaqlarımız işğalçılardan azad ediləndən sonra, hazırda işğal altında olan bütün torpaqlarda, o cümlədən Laçında bundan da gözəl qəsəbələr, kəndlər salınacaqdır. Biz bunu edəcəyik”. Artıq bu proses gedir. Biz inanırıq ki, yaxın illərdə məhz müzəffər Ali Baş Komandan İlham Əliyev cənabları ad günlərindən birini abad və müasir Laçında, laçınlılarla birlikdə keçirəcək.