YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

2020-ci ilin əsas hadisələri

Yola saldığımız 2020-ci il müstəqil Azərbaycanın tarixinə şanlı səhifə kimi yazıldı. Müdrik Prezidentimiz, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə aparılan 44 günlük Vətən müharibəsi nəticəsində Qarabağ işğaldan azad edildi, xalqımızın 30 illik yurd həsrətinə son qoyuldu. Çoxəsrlik Azərbaycan tarixində buna bənzər şərəfli və qürurlu günlər olmayıb.

2020-ci ildə dünya koronavirus bəlası ilə üzləşdi. İlk günlərdən Ümumdünya Səhiyyə Təşkilatı ilə sıx əməkdaşlıq edən Azərbaycan COVID-19 pandemiyası ilə mübarizədə qlobal müstəvidə fəal rol oynadı.

AZƏRTAC-a istinadən ilin bu və ya digər mühüm hadisələri barədə informasiyaları təqdim edirik.

Dünya İqtisadi Forumunun Azərbaycanda regional mərkəzinin yaradılması haqqında niyyət protokolu imzalandı

21 yanvar. Azərbaycan Prezidenti İlham Əliyevin Davosda Dünya İqtisadi Forumunun prezidenti Borge Brende ilə görüşündə Dünya İqtisadi Forumunun ölkəmizdə afilə edilmiş regional mərkəzinin yaradılması ilə bağlı niyyət protokolu imzalandı.

Milli Məclisə seçkilər keçirildi

9 fevral. Azərbaycanda Milli Məclisə seçkilər keçirildi. Parlament seçkilərində 125 deputat mandatı uğrunda 1314 namizəd mübarizə apardı.

Abşeron dairəvi dəmir yolunun Pirşağı-Görədil-Novxanı-Sumqayıt hissəsi açıldı

18 mart. “Azərbaycan Dəmir Yolları” Qapalı Səhmdar Cəmiyyətinin Abşeron dairəvi dəmir yolunun Pirşağı-Görədil-Novxanı-Sumqayıt hissəsinin yenidənqurmadan sonra açılışı oldu.

Azərbaycanda Koronavirusla Mübarizəyə Dəstək Fondu yaradıldı

19 mart. Prezident İlham Əliyev Azərbaycan Respublikasında əhalinin sağlamlığının qorunması və koronavirus infeksiyasına qarşı mübarizənin gücləndirilməsi ilə bağlı tədbirlər haqqında Fərman imzaladı. Fərmana əsasən, Koronavirusla Mübarizəyə Dəstək Fondu yaradıldı.

Virtual məktəblayihəsinə start verildi

2 aprel. Təhsil Nazirliyi tərəfindən “Virtual məktəb” layihəsinə start verildi. Layihənin məqsədi Təhsil Nazirliyi tərəfindən yayımlanan teledərslərin interaktivliyini təmin etmək və ümumilikdə məsafədən tədris imkanlarını genişləndirməkdir.

Türk Şurasının fövqəladə Zirvə görüşü keçirildi

10 aprel. Azərbaycan Prezidenti, Türkdilli Dövlətlərin Əməkdaşlıq Şurasının sədri İlham Əliyevin təşəbbüsü ilə Türk Şurasının videokonfrans vasitəsilə koronavirus pandemiyası ilə mübarizə mövzusuna həsr olunan fövqəladə Zirvə görüşü keçirildi.

Qoşulmama Hərəkatının Təmas Qrupu formatında Zirvə görüşü keçirildi

4 may. Qoşulmama Hərəkatının sədri kimi Azərbaycan Prezidenti İlham Əliyevin təşəbbüsü ilə Qoşulmama Hərəkatının Təmas Qrupu formatında videokonfrans vasitəsilə “COVID-19-a qarşı birlikdəyik” mövzusunda Zirvə görüşü keçirildi.

Bakıda modul tipli ilk xəstəxana kompleksi açıldı 

7 may. Bakıda modul tipli ilk xəstəxana kompleksinin açılışı oldu. Prezident İlham Əliyev və birinci xanım Mehriban Əliyeva kompleksin açılışında iştirak etdilər.

Bakının Nizami rayonunda 3 saylı DOST mərkəzi istifadəyə verildi

19 may. Əmək və Əhalinin Sosial Müdafiəsi Nazirliyinin tabeliyində olan Dayanıqlı və Operativ Sosial Təminat Agentliyinin Bakının Nizami rayonunda yerləşən 3 saylı DOST mərkəzi istifadəyə verildi. Prezident İlham Əliyev və birinci xanım Mehriban Əliyeva mərkəzin açılışında iştirak etdilər. Birinci vitse-prezident Mehriban Əliyevanın təşəbbüsü olan DOST layihəsi dövlət sosial xidmətlərin innovativ yanaşmalar əsasında modern və çevik, tam şəffaf mexanizmlər üzərində qurulması ilə ölkəmizin bu sahədə yeni brendidir.

Ermənistan silahlı qüvvələri Tovuz istiqamətində təxribat törətdi

12 iyul. Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz rayonu sahəsində atəşkəs rejimini kobud şəkildə pozaraq artilleriya qurğularından istifadə etməklə mövqelərimizi atəşə tutdular. Azərbaycan Ordusu tərəfindən görülən adekvat tədbirlər nəticəsində düşmən itki verərək geri oturduldu.

“Qarabağ” yatağının dayaq bloku dənizə yola salındı

10 avqust. “Qarabağ” yatağının dayaq blokunun dənizə yola salınması mərasimi keçirildi. Prezident İlham Əliyev mərasimdə iştirak etdi.

Azərbaycanın üç şəhəri UNESCO-nun Öyrənən Şəhərlər üzrə Qlobal Şəbəkəsinə üzv seçildi

23 sentyabr. Bakı, Gəncə və Qəbələ UNESCO-nun həyatboyu təhsil sahəsində aparıcı qurumu olan Öyrənən Şəhərlər üzrə Qlobal Şəbəkəyə üzv seçildi. Qlobal Şəbəkənin üzvləri sırasında Azərbaycan şəhərləri ilk dəfə yer aldı.

Ermənistan silahlı qüvvələri bütün cəbhəboyu genişmiqyaslı təxribat törətdi. Vətən müharibəsi başladı.

27 sentyabr. Ermənistan silahlı qüvvələri bütün cəbhəboyu genişmiqyaslı təxribat törətdi. Düşmənin təxribatlarına cavab olaraq Azərbaycan Ordusu əks-hücum əməliyyatlarına başladı. Prezident, Ali Baş Komandan İlham Əliyev xalqa müraciət edərək bu barədə məlumat verdi. Hərbi əməliyyatların ilk günü Murovdağ və Ağdərə istiqamətlərində strateji yüksəkliklər və bir sıra kəndlər işğaldan azad olundu.

BMT-nin Baş katibi Antonio Quterreşlə Prezident İlham Əliyev arasında görüş oldu

28 sentyabr. BMT-nin Baş katibi Antonio Quterreşin təşəbbüsü ilə onunla Azərbaycan Respublikasının Prezidenti İlham Əliyev arasında videokonfrans formatında görüş keçirildi.

Cəbrayıl şəhəri və rayonun bir neçə kəndi işğaldan azad edildi

4 oktyabr. Cəbrayıl şəhəri və rayonun bir neçə kəndi işğaldan azad olundu. Prezident, Ali Baş Komandan İlham Əliyev bu münasibətlə xalqa müraciət etdi.

Xocavənd rayonunun Hadrut qəsəbəsi işğaldan azad olundu

9 oktyabr. Azərbaycan Ordusunun uğurlu əməliyyatları nəticəsində Xocavənd rayonunun Hadrut qəsəbəsi və bir neçə kəndi işğaldan azad olundu. Bununla əlaqədar Azərbaycan Prezidenti İlham Əliyev xalqa müraciət etdi.

Gəncə şəhəri ballistik raketlə atəşə tutuldu

11 oktyabr. Ermənistan silahlı qüvvələri Gəncə şəhərini ballistik raketlə atəşə tutdu.

Baş Prokurorluğun məlumatına əsasən, Ermənistan silahlı qüvvələrinin Gəncənin mərkəzi hissəsindəki çoxmənzilli yaşayış binalarını raket atəşinə tutması nəticəsində 10 nəfər həlak oldu, 35-dən çox şəxs yaralandı, 10-dan artıq çoxmənzilli binaya və 100-dən çox müxtəlif təyinatlı obyektə ziyan dəydi.

Ermənistan silahlı qüvvələri Gəncəyə ikinci dəfə ballistik raket atdı

17 oktyabr. Ermənistan silahlı qüvvələri Gəncə şəhərini ikinci dəfə ballistik raketlə atəşə tutdu.

Baş Prokurorluğun məlumatına görə, düşmənin Gəncəyə xain hücumu nəticəsində 13 nəfər həlak oldu, 48-dən çox şəxs xəsarət aldı, çoxsaylı mülki infrastruktur obyektinə, nəqliyyat vasitələrinə küllü miqdarda ziyan dəydi.

Füzuli şəhəri işğaldan azad edildi

17 oktyabr. Füzuli şəhəri və rayonun bir neçə yaşayış məntəqəsi işğalçılardan azad olundu. Azərbaycan Prezidenti, Müzəffər Ali Baş Komandan İlham Əliyev bununla bağlı xalqa müraciət etdi.

Xudafərin körpüsü üzərində Azərbaycan bayrağı qaldırıldı

18 oktyabr. Azərbaycan Silahlı Qüvvələri qədim Xudafərin körpüsünün üzərində Azərbaycan bayrağını qaldırdılar.

Zəngilan şəhəri işğaldan azad olundu

20 oktyabr. Zəngilan şəhəri və rayonun 6 kəndi, Füzuli, Cəbrayıl, Xocavənd rayonlarının 18 kəndi işğaldan azad olundu. Azərbaycan Prezidenti İlham Əliyev bu münasibətlə xalqa müraciət etdi.

Qubadlı şəhəri işğalçılardan azad edildi  

25 oktyabr. Azərbaycan Ordusu Zəngilan, Cəbrayıl, Qubadlı rayonlarının bir neçə kəndini və Qubadlı şəhərini işğalçılardan azad etdi. Həmin gün Prezident, Müzəffər Ali Baş Komandan İlham Əliyevin rəhbərliyi ilə Müdafiə Nazirliyinin Mərkəzi Komanda Məntəqəsində operativ müşavirə keçirildi.

Ermənistan ordusu Bərdə şəhərini raket atəşinə tutdu

28 oktyabr. Ermənistan silahlı qüvvələri Bərdə şəhərini "Smerç” yaylım atəşli reaktiv sistemindən atəşə tutdu.

Baş Prokurorluğun məlumatına əsasən, raket zərbələri nəticəsində 21 dinc sakin həlak oldu, 70-dən çox şəxs isə bədən xəsarəti aldı. Çoxsaylı mülki infrastruktur obyektinə, evlərə və nəqliyyat vasitələrinə külli miqdarda ziyan dəydi.

Şuşa işğaldan azad olundu

8 noyabr. Qarabağın tacı, döyünən ürəyi Şuşa şəhəri işğaldan azad olundu.

Azərbaycan Prezidenti, Müzəffər Ali Baş Komandan İlham Əliyev və birinci xanım Mehriban Əliyeva Fəxri xiyabanı və Şəhidlər xiyabanını ziyarət etdilər. Dövlətimizin başçısı Şəhidlər xiyabanında Azərbaycan xalqına müraciət etdi.

İşğal altındakı daha 71 kənd, 1 qəsəbə və 8 strateji yüksəklik azad olundu

9 noyabr. Ermənistanın işğalı altındakı daha 71 kənd, 1 qəsəbə, 8 strateji yüksəklik işğaldan azad olundu. Ümumiyyətlə, Vətən müharibəsinin 44 günü ərzində - sentyabrın 27-dən noyabrın 9-dək rəşadətli Azərbaycan Ordusu 5 şəhəri, 4 qəsəbəni və 286 kəndi işğaldan azad etdi.

Qarabağda atəşkəs barədə üçtərəfli bəyanat imzalandı

10 noyabr. Azərbaycan Prezidenti, Ermənistanın baş naziri və Rusiya Prezidenti Dağlıq Qarabağ münaqişə zonasında atəşin və bütün hərbi əməliyyatların tam dayandırılması barədə bəyanat imzaladılar.

Prezident İlham Əliyev və birinci xanım Mehriban Əliyeva Füzuli və Cəbrayıla səfər etdilər

16 noyabr. Azərbaycan Prezidenti, Müzəffər Ali Baş Komandan İlham Əliyev və birinci xanım Mehriban Əliyeva işğaldan azad edilmiş Füzuli və Cəbrayıl rayonlarında, o cümlədən Füzuli və Cəbrayıl şəhərlərində oldular. Prezident İlham Əliyev Füzuli rayonundan Şuşa şəhərinə yol çəkilişi ilə bağlı göstəriş verdi.

Ağdam rayonu Azərbaycana təhvil verildi

20 noyabr. Üçtərəfli bəyanata uyğun olaraq, noyabrın 20-də Ağdam rayonu Azərbaycana təhvil verildi. Həmin gün Azərbaycan Ordusunun bölmələri Ağdam rayonuna daxil oldu və Ağdam şəhərinə dövlət bayrağımız sancıldı. Bununla bağlı Prezident İlham Əliyev xalqa müraciət etdi.

 

Prezident İlham Əliyev və birinci xanım Mehriban Əliyeva işğaldan azad edilmiş Ağdamda oldular

23 noyabr. Prezident, Müzəffər Ali Baş Komandan İlham Əliyev və birinci xanım Mehriban Əliyeva işğaldan azad edilmiş Ağdam şəhərində oldular. Dövlətimizin başçısı Ağdam məscidinin qarşısında çıxış etdi.

Kəlbəcər rayonu Azərbaycana qaytarıldı

25 noyabr. Bəyanata əsasən, noyabrın 25-də Kəlbəcər rayonu Azərbaycana qaytarıldı. Həmin gün Azərbaycan Ordusunun bölmələri Kəlbəcər rayonuna daxil oldu. Bu münasibətlə Prezident İlham Əliyev xalqa müraciət etdi.

Laçın rayonu Azərbaycana təhvil verildi

1 dekabr. Laçın rayonu Azərbaycana təhvil verildi. Həmin gün Azərbaycan Ordusunun bölmələri Laçın rayonuna daxil oldu və rayonda Azərbaycanın dövlət bayrağı qaldırıldı. Azərbaycan Prezidenti İlham Əliyev xalqa müraciət etdi.

Bununla da üçtərəfli bəyanata uyğun olaraq, Ağdam, Kəlbəcər və Laçın rayonlarının sülh yolu ilə qaytarılması prosesi yekunlaşdı.

Prezident İlham Əliyevin təşəbbüsü ilə BMT Baş Assambleyasının Xüsusi Sessiyası keçirildi

3 dekabr. Azərbaycan Prezidenti İlham Əliyevin təşəbbüsü ilə Nyu-Yorkda BMT Baş Assambleyasının COVID-19 pandemiyası ilə mübarizəyə həsr edilmiş dövlət və hökumət başçıları səviyyəsində videoformatda Xüsusi Sessiyası keçirildi. Prezident İlham Əliyev sessiyada çıxış etdi.

Azadlıq meydanında Zəfər paradı keçirildi

10 dekabr. Bakının Azadlıq meydanında Vətən müharibəsində Qələbəyə həsr olunmuş Zəfər paradı keçirildi. Azərbaycan Prezidenti İlham Əliyev və birinci xanım Mehriban Əliyeva, Türkiyə Prezidenti Rəcəb Tayyib Ərdoğan və xanımı Əminə Ərdoğan Zəfər paradında iştirak etdilər.

Prezident İlham Əliyev və birinci xanım Mehriban Əliyeva Qubadlı və Zəngilan rayonlarına səfər etdilər

23 dekabr. Prezident İlham Əliyev və birinci xanım Mehriban Əliyeva işğaldan azad edilmiş Qubadlı və Zəngilan rayonlarında oldular. Müzəffər Ali Baş Komandan Ermənistanın qanunsuz məskunlaşma apardığı Qubadlının Xanlıq kəndində hərbçilərlə görüşdü, Qubadlıda və Zəngilanda Azərbaycan bayrağını ucaltdı.