YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

Təmraz Tağıyev: Azərbaycan Prezidenti BMT-nin 75 illiyinə həsr edilmiş Yüksək Səviyyəli İclasda tarixi çıxış etdi

“Azərbaycan Prezidenti İlham Əliyevin BMT Baş Assambleyasının sessiyası çərçivəsində BMT-nin 75 illiyinə həsr edilmiş Yüksək Səviyyəli İclasında tarixi çıxış etdi. Cənab Prezident Qoşulmama Hərəkatının sədri kimi çıxışında dünyanı narahat edən problemlər, münaqişələr, koronavirus pandemiyası ilə mübarizə, BMT-də islahatların aparılmasının zəruriliyi ilə bağlı fikirlərini ifadə etdi”. Bu fikirləri Yeni Azərbaycan Partiyası (YAP) Nərimanov rayon təşkilatının sədri Təmraz Tağıyev  deyib.

Təmraz Tağıyev  bildirib ki, BMT-nin struktrunda islahatların aparılmasına, bu təşkilatın dünyada baş verən proseslərdə ədalətli rolunun gücləndirilməsinə ehtiyac var. Dövlət başçısının qeyd etdiyi kimi, beynəlxalq hüquqa hörmət və bunu təmin etmək iqtidarında olan səmərəli qlobal təsisatlara ehtiyacı var. Bu baxımdan Qoşulmama Hərəkatının rolu mühüm əhəmiyyətə malikdir. Qoşulmama Hərəkatı BMT-nin rolunun gücləndirilməsinə çox böyük əhəmiyyət verir və onun potensialından tam istifadə olunması üçün səylərin göstərilməsini vacib hesab edir. “Cənab Prezident çıxışında qeyd etdi ki, BMT-nin gücləndirilməsi və müasirləşdirilməsi, Baş Assambleyanın canlandırılması, beynəlxalq sülh və təhlükəsizlik sahəsində təşkilatın demokratik, məsuliyyətli, şəffaf və təmsilçiliyi təmin edən orqana çevrilməsi üçün BMT Təhlükəsizlik Şurasında islahatların aparılmasına çağırırıq. BMT universal üzvlüyü təmin edən yeganə qlobal təsisatdır və beləliklə də dayanıqlı inkişafa nail olunması məqsədilə qlobal iqtisadi idarəçiliyi əhatə etmək iqtidarındadır. Bu səbəbdən BMT-nin qlobal iqtisadi idarəçilikdə rolu gücləndirilməlidir”,-deyən təşkilat sədri qeyd edib ki, Prezident İlham Əliyevin belə bir mötəbər toplantıda Qoşulmama Hərəkatının adından çıxış etməsi Azərbaycanın beynəlxalq miqyasda artan nüfuzunun göstəricisidir.

Onun sözlərinə görə, Dağlıq Qarabağ münaqişəsinin həlli ilə bağlı BMT Təhlükəsizlik Şurasının qəbul etdiyi qətnamələrin hələ də icra olunmaması təşkilatın nüfuzuna zərbədir. Bu baxımdan, Prezident İlham Əliyevin çıxışı zamanı bu məsələni vurğulaması böyük əhəmiyyət kəsb edir. “Dövlətimizin başçısı çıxışında qeyd etdi ki, Ermənistan Azərbaycanın Dağlıq Qarabağ bölgəsini və ətraf yeddi rayonunu işğal edib. BMT Təhlükəsizlik Şurasının 1993-cü ildə qəbul edilmiş dörd qətnaməsi Ermənistan silahlı qüvvələrinin işğal edilmiş Azərbaycan torpaqlarından tam, dərhal və qeyd-şərtsiz çıxarılmasını tələb edir. Təəssüflər olsun ki, Ermənistan hələ də bu qətnamələrə məhəl qoymamaqda davam edir. Bütövlükdə, çıxışı zamanı Prezident İlham Əliyev Ermənistanın işğalçılıq siyasətini, təcavizkar niyyətini və törətdiyi təxribatları tamamilə ifşa etdi. Məlumdur ki, Ermənistan işğal olunmuş ərazilərdə azərbaycanlı əhaliyə qarşı etnik təmizləmə həyata keçirib, bir milyondan çox azərbaycanlı qaçqın və məcburi köçkün vəziyyətinə düşüb. Ermənistan işğal olunmuş ərazilərimizdə beynəlxalq hüquq normalarını kobud şəkildə pozaraq qanunsuz məskunlaşdırma siyasəti həyata keçirir. Ermənistan işğal olunmuş ərazilərdə Azərbaycan xalqına məxsus tarixi və dini abidələri məhv edib. Bütün bu faktları bəyan edən  cənab Prezident Ermənistanın son təxribatları haqqında da məlumat verib, mülki əhalinin və mülki infrastrukturun da qəsdən hədəfə alındığını diqqətə çatdırıb. Cənab Prezident bir daha bəyan edib ki, münaqişə Azərbaycanın ərazi bütövlüyü çərçivəsində həll olunmalı, torpaqlarımız işğaldan azad edilməli və məcburi köçkünlər öz yurdlarına qayıtmalıdırlar”-deyən, T.Tağıyevin sözlərinə görə, beynəlxalq birlik Azərbaycan Prezidentinin bəyanatından və çağırışlarından nəticə çıxarmalı və Ermənistanı sülhə məcbur etmək üçün addımlar atmalıdır.