YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

Vüqar Rəhimzadə: Prezident İlham Əliyevin BMT Baş Assambleyasının xüsusi sessiyasının keçirilməsi təşəbbüsü qlobal liderliyin göstəricisidir

«Koronavirus pandemiyasına qarşı mübarizə ilk gündən hər bir ölkədən yalnız daxildə deyil, regional və qlobal çərçivədə birliyə, həmrəyliyə xidmət edən tədbirlərin gücləndirilməsinə çağırış etdi. Daim birləşdirici, sabitləşdirici mövqeyi ilə dünyanın diqqətində olan Azərbaycan bu müddətdə daxili tədbirləri ilə yanaşı, eyni zamanda, birliyə, həmrəyliyə xidmət edən təşəbbüslərini reallıqda təsdiqləməsi ilə diqqət çəkdi. Dövlətimizin başçısı İlham Əliyevin təşəbbüsü ilə Türk Şurasının, həmçinin BMT Baş Assambleyasından sonra ikinci ən böyük beynəlxalq təsisat olan və 120 ölkəni sıralarında birləşdirən Qoşulmama Hərəkatının videokonfrans şəklində Zirvə görüşləri keçirildi, bu beynəlxalq tədbirlərdə dünyaya “COVID-19-a qarşı birlikdəyik» mesajı ünvanlandı. Bu kimi tədbirlər beynəlxalq səviyyədə Azərbaycana və Prezidentimiz İlham Əliyevə olan böyük inamın və etimadın göstəricisi kimi dəyərləndirildi. Bu gün bu sıraya cənab İlham Əliyevin BMT Baş Assambleyasının COVID-19-a qarşı mübarizəyə həsr olunmuş xüsusi sessiyasının keçirilməsi təşəbbüsü və ona verilən yüksək dəstək də daxil edilir.» Bu fikirləri Yeni Azərbaycan Partiyası Siyasi Şurasının üzvü, «İki sahil» qəzetinin baş redaktoru, siyasi elmlər doktoru Vüqar Rəhimzadə KİV-ə açıqlamasında bildirib.

 V.Rəhimzadə qeyd edib ki, bu təşəbbüslər, onların reallaşması, bu fonda yeni təşəbbüslərə yol açan addımlar, dünya dövlətləri tərəfindən verilən dəstək və sair kimi məqamlar göstərir ki, ölkəmiz koronavirus pandemiyası ilə bağlı formalaşan yeni reallıqlara, yaranmış vəziyyətə çevik və adekvat reaksiya verir. Azərbaycanın pandemiyaya qarşı mübarizə sahəsində nümunəvi ölkə kimi təşəbbüsləri təqdir olunur, həyata keçirdiyi tədbirlər yüksək dəyərləndirilir.

 Baş redaktor bildirib ki, COVID-19 qlobal pandemiyası bütün dünya dövlətlərinin iqtisadiyyatına, xüsusilə insanların sağlamlığına mənfi təsir göstərir. Möhtərəm Prezidentimiz İlham Əliyev Qoşulmama Hərəkatının Təmas Qrupu formatında Zirvə görüşündə bu reallığı diqqətə çatdırmışdır ki, yalnız qarşılıqlı dəstək, özünəqapanmama və birgə səylərlə COVID-19-a qalib gələ bilərik.

 «Özünəqapanma təbii ki, heç bir dövlətə uğur gətirə bilməz. Səylərin birləşdirilməsi, birgə addımların atılması, təcrübə mübadiləsinin aparılması fonunda nəzərdə tutulan hədəfə yüksək səviyyədə nail olmaq mümkündür» söyləyən V.Rəhimzadə qeyd edib ki, Azərbaycanın ötən müddətdə Ümumdünya Səhiyyə Təşkilatına könüllü ianə ayırması və 30-dan artıq ölkəyə humanitar yardım göstərməsi də birliyin, həmrəyliyin genişləndirilməsində, ehtiyacı olan ölkələrə dəstəyin göstərilməsində nə qədər maraqlı olduğunu nümayiq etdirir.

 Dövlətimizin başçısı İlham Əliyevin «Biz bunu etməyə də bilərdik. Kimsə bizə bir söz deyəcəkdi? Yox. Kim bizə irad tuta bilərdi ki, bu ağır dövrdə biz bu təşəbbüsü irəli sürməsəydik. Amma biz bunu etdik. Çünki biz məsuliyyətli ölkəyik və etibarlı tərəfdaşıq» fikirlərini önə çəkən V.Rəhimzadə vurğulayıb ki, Azərbaycan Qoşulmama Hərəkatının Zirvə görüşünün keçirilməsinə nail olmaqla iki əks qütbün –Avropa İttifaqı ilə Qoşulmama Hərəkatının koronavirus pandemiyasına qarşı bir araya gətirilməsinə müvəffəq oldu. Möhtərəm Prezidentimizin fikirlərinə istinad etsək, Azərbaycan dünyanı birləşdirir. Beynəlxalq təşkilatlar çərçivəsində irəli sürülmüş təşəbbüslər dünya birliyi tərəfindən birmənalı şəkildə yüksək qiymətləndirilir və təqdir edilir.

 «Azərbaycan dövləti bu çağırışı da etdi ki, koronavirus pandemiyası qlobal təhlükə olduğu üçün qlobal cavab tələb edir. Nəzərə alsaq ki, Qoşulmama Hərəkatı Birləşmiş Millətlər Təşkilatına üzv olan dövlətlərin üçdəikisini özündə birləşdirir, bu halda hər bir ölkənin ortaya qoyduğu yanaşmanın mübarizənin müsbət sonluqla başa çatmasında rolunu aydın görərik» söyləyən baş redaktor vurğulayıb ki, amma bu günə kimi beynəlxalq münasibətlər sistemində BMT və onun əsas qurumları olan Baş Assambleya və Təhlükəsizlik Şurasının rolu görünmür, dünyanın aparıcı ölkələri qlobal liderlik əvəzinə geosiyasi rəqabət və özünütəcridə kökləniblər: «Böyük dövlətlər və beynəlxalq təşkilatlardan qlobal liderlik gözlənilsə də bu baş vermədi. Daha çox özünütəcrid, milli eqoizm xarakteri daşıyan addımlar atıldı. BMT Təhlükəsizlik Şurasının xüsusi iclaslarının çağırılması təşəbbüsü fikir ayrılığına görə baş tutmadı. BMT Baş Məclisi çərçivəsində bir neçə qətnamə layihəsi irəli sürülsə də onların da əksəriyyəti uğurla nəticələnmədi. Dövlətimizin başçısı İlham Əliyev Qoşulamama Hərəkatının videokonfras şəklində Zirvə görüşündə çıxışı zamanı qlobal həmrəyliyin nümunəsi kimi pandemiya ilə mübarizə məqsədilə BMT Baş Assambleyasının dövlət və hökumət başçıları səviyyəsində videokonfrans vasitəsilə xüsusi sessiyasının keçirilməsi təklifi ilə çıxış etdi.»

 V.Rəhimzadə bildirib ki, 130-a qədər BMT-nin üzv dövləti tərəfindən Qoşulmama Hərəkatının sədri statusunda Prezident İlham Əliyevin BMT Baş Assambleyasının xüsusi sessiyasının keçirilməsi barədə təşəbbüsünün dəstəklənməsi bir daha beynəlxalq birlik tərəfindən ölkəmizə olan böyük etimadın və hörmətin növbəti göstəricisidir: «Azərbaycanın beynəlxalq münasibətlər sistemində artan rolu və yeri göz qabağındadır. Daim ədalət meyarını öndə saxlayan, beynəlxalq hüququn norma və prinsiplərinə hörmətlə yanaşan Azərbaycan qlobal məsələlərin həllində öz dəstəyini göstərməyi xarici siyasətinin prioritet istiqaməti kimi qəbul edib. Əsas məqsəd regionda və dünyada sabitliyin, təhükəsizliyin, yüksək rifahın təmin edilməsidir. Sülhün, əmin-amanlığın, insanların sağlamlığının qorunması fonunda qarşıya qoyulan hədəfləri gerçəkləşdirmək qaçılmazdır. Nəzərə alsaq ki, bu gün koronavirus təkcə insanların sağlamlığına deyil, ölkələrin iqtisadiyyatına böyük təhdiddir, statistikaya müraciət etdikdə vurulan ziyanın həcminin nə qədər böyük olduğu aydın görünür. Məhz birliyin, həmrəyliyin formalaşdırılması, hər bir ölkənin malik olduğu təcrübəni paylaşması, maddi və mənəvi dəstəyin göstərilməsi əsasında qarşıdakı dövrə nikbin baxmaq, bu yönümdə fədakarlıq göstərmək olar.»

 Baş redaktor bu məqamı xüsusi qeyd edib ki, təşəbbüsə qarşı çıxan yeganə dövlət Ermənistan olub: «Hər bir məsələdə seyrçi mövqedə dayanmağa üstünlük verən işğalçı dövlətin sağlamlığa böyük zərbə vuran bir xəstəlyiyə qarşı mübarizəyə də qoşulmaması dünya dövlətləri tərəfindən lazımi şəkildə dəyərdəndirilməyəcəksə, bu, artıq Ermənistanın başına sığal çəkilməsinin növbəti təzahürü kimi qəbul oluna bilər. Bu baxımdan ki, işğalçı dövlət qlobal xarakter daşıyan bu təşəbbüsə qarşı çıxış etməklə BMT sistemində və dünya dövlətləri arasında özünü rüsvay edir. Bu günə qədər BMT Təhlükəsizlik Şurasının qərar və qətnamələrinə məhəl qoymayan və buna görə ona «gözün üstə qaşın var» deyilməməsi təcavüzkar dövlətdə böyük arxayınlıq yaradır. Hansı ki, hazırda pandemiyanın ağır nəticələrini daha çox hiss edən ölkələrdən biri bu işğalçı dövlətdir. Hər an özünə maddi və mənəvi dəstəyi hiss etməsi bu ölkədə pandemiyaya qarşı mübarizəyə qoşulsa da qoşulmasa da, bu qayğını görəcəyinə arxayınlıq yaradır. Pandemiyaya qarşı mübarizə iki əks qütbü- Avropa İttifaqını və Qoşulmama Hərəkatını bir araya gətirdi, amma Ermənistana təsir etmək imkanında olmadısa, buna artıq şərh vermək mümkün deyil.»

 Vüqar Rəhimzadə bildirib ki, ümumilikdə Azərbaycan Prezidentinin təşəbbüsünü dəstəkləyən ölkələr dünyanın bütün regionlarını əhatə edir: «Onlar arasında BMT Təhlükəsizlik Şurasının daimi üzvlərindən tutmuş kiçik ada ölkələrinə qədər vardır. Azərbaycanın 130 ölkənin dəstəyini qazanan bu təşəbbüsü bir daha ölkəmizə olan münasibəti, etimadı ortaya qoyur. Siyasətində müstəqil olan, təbliğatı real faktlara əsaslanan, atdığı hər addımında dövlət maraqlarını öndə saxlayan bir dövlətə beynəlxalq səviyyədə dəstək qaçılmaz olacaq. Azərbaycan daim böyüklüyündən, kiçikliyindən asılı olmayaraq bütün dövlətlərlə bərabərhüquqlu, qarşılıqlı hörmət və maraqlar prinsipi əsasında əməkdaşlıq əlaqələri qurur, bu münasibətləri yeni-yeni istiqamətlər üzrə inkişaf etdirir. Dünya dövlətləri tərəfindən BMT Baş katibinə ünvanlanan məktublarda da möhtərəm Prezidentimiz İlham Əliyevin Baş Assambleyanın xüsusi sessiyasının keçirilməsi ilə bağlı təşəbbüsü dəstəklənir və vaxtında verilmiş, çox ehtiyac duyulan addım kimi dəyərləndirilir.

 Baş redaktor qeyd edib ki, pandemiyanın dünyanı geniş şəkildə bürüdüyü və hətta bəzi ölkələrdə ikinci dalğası yaşandığı indiki dövrdə həmrəyliyə və əməkdaşlığa böyük ehtiyacın olduğu özünü qabarıq şəkildə büruzə verir: «BMT Baş Assambleyası çərçivəsində belə bir qlobal problemin müzakirəyə çıxarılması, vahid yanaşma modelinin ortaya qoyulması vacibdir. Hər bir məsələdə fəal mövqedən çıxış edən Azərbaycan dövləti, möhtərəm Prezidentimiz İlham Əliyev bu inamı da səsləndirir ki, görülən tədbirlər mübarizədən az itki ilə çıxmağımıza əsas yaradır. Azərbaycan pandemiyaya qarşı mübarizədə ilk günlərdən Ümumdünya Səhiyyə Təşkilatı ilə səmərəli əməkdaşlıq edir. Məhz bu birlik, əməkdaşlıq sayəsində görülən işlər daim qurumun rəsmiləri tərəfindən önə çəkilir.

 «Göründüyü kimi, Azərbaycan koronavirus pandemiyasına qarşı mübarizədə həm ölkə daxilində, həm də dünyada öz fəal rolunu artırmaqdadır. Ölkəmiz öz təşəbbüsləri, praktiki addımları ilə dünyada həmrəyliyin möhkəmlənməsinə, indiki mürəkkəb şəraitdə dövlətlər və xalqlar arasında əlaqələrin inkişafına, qlobal koronavirus pandemiyası ilə mübarizədə bütün səylərin səfərbər olmasına töhfələrinin davamlılığı ilə diqqət çəkir» söyləyən V.Rəhimzadə qeyd edib ki, dövlətimizin başçısının davamlı təşəbbüsləri və bu təşəbbüslərin reallıqda öz əksini tapması bunu bir daha təsdiqləyir. COVID-19-a qarşı mübarizəyə birgə cavabın axtarılması virusun sürətlə yayılmasından, onun növbəti dalğalarının yaşanmasından ciddi narahatlığın aydın mənzərəsini yaradır. Azərbaycan Prezidenti tərəfindən Birləşmiş Millətlər Təşkilatının üzv dövlətlərinə milli, regional və beynəlxalq səviyyələrdə bu ümumbəşəri bəlaya qarşı mübarizə aparmaq istiqamətində əməkdaşlıqlarını möhkəmləndirməyə çağırış edilməsi təbii ki, dünyanı ciddi düşündürməli, artıq ədalətin, haqqın, ən əsası beynəlxalq hüququn norma və prinsiplərinin tətbiqi mexanizminin müəyyənləşdirilməsinin zamanı çatdığına bir işarə olmalıdır.

 Baş redaktor diqqəti Qoşulmama Hərəkatının videoformatda keçirilən konfransında BMT-nin Baş katibi Antonio Quterreşin videomüraciətində əksini tapan fikirlərə yönəldib. Qeyd edib ki, Azərbaycanın təşəbbüslərini yüksək dəyərləndirən BMT-nin Baş katibi bildirmişdir ki, burada yeganə cavab cəsarətli, uzaqgörən və əməkdaşlığa əsaslanan rəhbərlik keyfiyyətləridir. Bu böhranın miqyası və mürəkkəbliyi əlaqələndirilmiş qlobal cavab tədbirlərini tələb edir. Biz COVID-19-a səmərəli cavab tədbirlərinin hər kəs üçün və hər yerdə əlçatan olmasını və bərabərliyi təmin etməliyik. Videomüraciətdə pandemiyaya qarşı mübarizəyə ciddi əməli töhfələr verən Prezident İlham Əliyevin fəaliyyəti təqdir edilərək Azərbaycandan ünvanlanan birlik, həmrəylik çağırışlarının ölkəmizin beynəlxalq aləmdə nüfuzunun göstəricisi kimi qeyd olunmuşdur.