Xəbərlər
Səməd Seyidov: Şərq Tərəfdaşlığı Sammitində qəbul olunmuş sənəd Azərbaycanın maraqlarına tam cavab verir
Avropa İttifaqının Brüsseldə keçirilmiş Şərq Tərəfdaşlığı Sammitimdə qəbul edilən Birgə Bəyannamədə əks olunan müddəalar Azərbaycanın maraqlarına tam cavab verir.
Bu sözləri jurnalistlərə müsahibəsində Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov söyləyib.
Səməd Seyidov deyib ki, Brüssel Sammitində qəbul olunmuş sənəd Tbilisidə “Avropa İttifaqı və tərəfdaşları: daha güclü birlik naminə müxtəlifliyin əhatə olunması” mövzusunda beynəlxalq konfransda da müzakirə edildi. Bu sənəddə dövlətlərin ərazi bütövlüyü və suverenliyinin təsbit olunması Azərbaycan Prezidentinin xarici siyasətinin uğuru kimi qiymətləndirilir. Prezident İlham Əliyev Sammitdəki çıxışında da ərazi bütövlüyü, separatizmə qarşı birgə mübarizə məsələlərini qeyd edib. Bu gün Avropanın özündə də ciddi narahatlıq doğuran proseslər gedir. Ona görə də yekun sənəddə məhz həmin məsələlərin əksini tapması bizim üçün də çox vacibdir və bizim mövqelərimiz bu məsələdə üst-üstə düşür.
Son vaxtlar Avropa İttifaqı məkanında müxtəlif fikir ayrılıqlarının olduğunu vurğulayan Milli Məclisin komitə sədri deyib ki, Tbilisidə keçirilən konfransda əslində bu məsələlərə aydınlıq gətiriləcək. Son vaxtlar Avropa İttifaqının strukturlarında ciddi problemlər yaşanır. Müxtəlif fikir ayrılığı da bununla əlaqədardır. Ona görə də Brüssel Sammitindən sonra belə bir konfransın təşkili çox vacibdir.