YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

MÜSAHİBƏLƏR

Əminəm ki, parlament seçkilərində qələbə bizim partiyamızın olacaq

Müsahibimiz 22 saylı Nəsimi ikinci seçki dairəsi üzrə Yeni Azərbaycan Partiyasının deputatlığa namizədi Sərraf Hüseynov

- Sərraf müəllim, fevralın 9-da ölkəmizdə  keçiriləcək parlament seçkilərində Yeni Azərbaycan Partiyası  tərəfindən deputatlığa namizədliyiniz irəli sürülüb. Partiya rəhbərliyi tərəfindən belə bir yüksək etimadın göstərilməsi sizin üçün gözlənilməz olmadı ki?

- Mən öncə Yeni Azərbaycan Partiyasının Sədri, Prezidentimiz cənab İlham Əliyevə, daha sonra isə partiyamızın İdarə Heyətində yer alan şəxslərə öz təşəkkürümü bildirmək istərdim. Çünki məhz onların qərarı ilə biz gənclər də partiyamızın parlament seçkilərində iştirak üçün təsdiqlədiyi siyahıda yer aldıq. Bu əslində Yeni Azərbaycan Partiyasının gənclərinə olan böyük etimadın əyani göstəricisidir.

Onu qeyd etmək istərdim ki, bu siyahıda adımın olması mənim üçün gözlənilən idi, amma namizədliyimin Bakı şəhərinin ən böyük rayonlarından biri olan Nəsimi rayonundan verilməsi gözlənilməz oldu. Partiyamızın bu qərarını ona görə gözlənilən hesab edirəm ki, mən 18 yaşımdan Ulu Öndər Heydər Əliyevin siyasi irsinin dəstəkçisi olmuşam və bu yolda daima partiya rəhbərliyi tərəfindən öz fəaliyyətimə görə irəli çəkilmişəm. YAP Nəsimi rayon təşkilatında çalışmışam, YAP Nəsimi rayon təşkilatı Gənclər Birliyinin sədri, YAP Gənclər Birliyinin  Ofisinin rəhbəri olmuşam, partiyamızın 2013-cü ildə keçirilən V Qurultayında çıxışçılardan biri olmuşam. Düşünürəm ki, məhz bu fəaliyyətim partiyamızın rəhbərliyi tərəfindən nəzərə alınıb və mənim adım bu siyahıya daxil edilib.

- Parlament seçkilərində partiyamızın namizədləri arasında gənclərə də üstünlük verilib. Bu barədə nə deyə bilərsiniz?

- Partiyamızın namizədləri açıqlananda özümlə bərabər, gənc dostlarımın da adını burada görüb çox sevindim. İnanıram ki, mənim kimi dostlarımın hər birinin də qəlbi bu etimada görə minnətdarlıq hissi ilə doludur. Çünki biz o siyahıda məhz partiyanın həyata keçirdiyi işlərdə imzası olan gənclərin adlarını gördük. Namizədlərin böyük əksəriyyətinin gənclərdən ibarət olması həm bizim, həm də digər gənclər üçün böyük stimuldur. Hesab edirəm ki, bu təşəbbüs əslində cənab Prezidentimiz cənab İlham Əliyevə məxsusdur. Məhz cənab İlham Əliyev 6 dekabr tarixli çıxışında gənclərə üzünü tutraq demişdir: “İndi artıq növbədənkənar parlament seçkiləri elan olunub. Ümid edirəm ki, gənclər də bu seçkilərə çox fəal qoşulacaqlar. Çünki yeni simalar, yeni ideyalar, yeni yanaşma lazımdır”.

- Sizcə, Yeni Azərbaycan Partiyası  seçkilərə hansı uğurlarla gedir?

- Keçirilən sonuncu parlament seçkilərindən sonra ötən illərə nəzər saldıqda Yeni Azərbaycan Partiyasının Azərbaycanın dövlət quruculuğunda, ölkəmizin sosial-iqtisadi gücünün daha da artmasında, həmçinin qanunvericilik bazasının təkmilləşməsi işində böyük uğurlara imza atdığını düşünürəm. Heç şübhəsiz bu uğurların memarı partiyamızın Sədri cənab İlham Əliyevdir. Cənab İlham Əliyevin “Mən hər bir Azərbaycan vətəndaşının Prezidenti olacağam” şüarı düşünürəm ki, partiyanın da fəaliyyətinə, sıralarının genişlənməsinə səbəb oldu və nəticədə Yeni Azərbaycan Partiyası da hər bir azərbaycanlının partiyasına çevrilə bildi. Əminəm ki, bu seçkilərdə də görülən işlərin müqabilində qələbə bizim partiyamızın olacaq. Çünki xalq hər şeyi görürür və dəyərləndirməyi bacarır.

- Sərraf müəllim, seçkilərin təbliğat-təşviqat kampaniyası çərçivəsində seçicilərlə görüşlər keçirirsiniz. Bu görüşlərlə bağlı  təəssüratınız necədir?

- Seçicilərlə görüşlərimizdə çox qəribə bir situasiya ilə qarşılaşıram. Sanki məndən əvvəl kimsə getdiyim ailəyə, olduğum məhəlləyə gedib və cənab Prezidentin Sədrlik etdiyi Yeni Azərbaycan Partiyası haqda orada təbliğat aparıb. Əslində, bu çox gözəldir. İnsanlarımız Prezidentimiz İlham Əliyevin, Birinci vitse-prezidentimiz Mehriban xanım Əliyevanın Azərbaycan insanı, Azərbaycan dövləti üçün nələr etdiyində çox yaxşı xəbərdardır. Hansı şəhid ailəsinin qapısını döyürsən, hansı fiziki məhdudiyyətli sakini dindirirsən, istənilən şəxsə yaxınlaşırsan və Yeni Azərbaycan Partiyasının təmsilçisi kimi onu seçkiyə dəvət edirsən, o əvvəlcə dövlətin onlara göstərilən qayğısından ağızdolusu danışır. Sonra isə nəinki özü, hətta digərlərini də seçkiyə təşviq edərək onların seçkiyə getməsini və Yeni Azərbaycan Partiyasının namizədlərinə səs verməsini istəyir.

Dövlətimiz insanların nəinki sosial, ictimai, hətta şəxsi problemlərinin həlli üçün də əlindən gələni edir. Dövlətin, Heydər Əliyev Fondunun insanlarımıza göstərdiyi bu diqqət və qayğı bizləri də daha ürəklə təbliğat-təşviqat işi aparmağa sövq edir. Düşünürəm ki, partiyamızın Sədri İlham Əliyevin, partiyanın Sədr müavini, birinci xanım Mehriban Əliyevanın gördüyü işlər məhz Yeni Azərbaycan Partiyasının namizədlərinə ölkəmizin hər yerində qapıları taybatay açır. Belə bir yolun yolçisi olmaq bizlər üçün də şərəfdir.